"Дэлгэр говийн хүн" сан нь говийн бүсэд эрэлт хэрэгцээтэй, дутагдалтай мэргэжлээр дотоодын их сургууль, коллежид суралцаж буй болон элсэгч оюутнуудыг дэмжих, орон нутгийн хөгжилд хувь нэмэр оруулах чадвартай хүний нөөцийг бэлтгэх зорилгоор сургалтын бүтэн төлбөр бүхий тэтгэлэг олгодог. 2024-2025 хичээлийн жилд 70 сая төгрөгийн тэтгэлгийн санг Хөвсгөл, Дэлгэрэх, Замын-Үүд, Айраг, Алтанширээ, Иххэт, Сайншанд гэсэн 7 сумын19 оюутны сургалтын төлбөрт зориулсан. 

2025 оны 2 сарын 1-ны өдөр сангийн удирдлагын төлөөлөл тэтгэлэг хүртсэн нийт оюутнуудтай уулзалт зохион байгуулж тэтгэлгийн журам, тэтгэлэг хүртсэн оюутнуудыг сургалтын хөтөлбөрөөс гадуур чадавхжуулах талаар ярилцав.

Тухайлбал, оюутнууд сургуулиа төгсөөд ажлын байрны шаардлага бүрэн хангахад нэмэлт ур чадваруудыг шаардаж буй тул тэтгэлгээр суралцагч оюутнуудын гадаад хэл, программ хангамж, ажлын байрны соёл болон харилцааны ур чадваруудыг сайжруулахад анхаарч нэмэлт хөтөлбөрт хамруулах юм. 

Говийн бүсийн зөвлөлийн анхдугаар хуралдаан Дорноговь аймгийн Сайншанд хотод зохион байгуулагдаж Дэлгэр говийн хүн сангийн төлөөлөл оролцлоо.

Тус хуралдаанд Засгийн газрын гишүүд, говийн бүсээс сонгогдсон УИХ-ын гишүүд, аймгуудын удирдлагууд, эрдэм шинжилгээ, судалгаа байгууллага, олон улсын байгууллага болон төрийн бус байгууллагын төлөөллүүд оролцсон бөгөөд бүсийн хөгжлийг хязгаарлаж буй хүчин зүйлсийг орон нутагт нь хэлэлцэн шуурхай шийдвэрлэх, харилцан санал солилцож нэгдсэн ойлголтод хүрэх, “Монгол Улсын Бүсчилсэн хөгжлийн бодлого”-ыг хэрэгжүүлэхэд чухал ач холбогдолтой гэж оролцогч талууд онцолсон.

Дэлгэр говийн хүн сан нь “Говийн хүний хөгжлийг тогтвортой үр дүнд хүргэхэд дэмжлэг үзүүлэх” зорилготой бөгөөд засаглалын стратегийн чиглэлийнхээ хүрээнд ил тод, нээлттэй, хариуцлагатай, сайн засаглалд  иргэд, олон нийтийн оролцоог нэмэгдүүлэхэд чиглүүлэгч болох зорилт дэвшүүлсэн ажиллаж байна.

Ялангуяа, хөгжлийн бодлого төлөвлөлт, хэрэгжилтэд иргэд, олон нийтийн оролцоо, хяналтыг сайжруулах замаар үр дүн болон зөвхөн эдийн засаг бус, нийгэм, байгаль орчны хөгжилд чиглүүлэх үйл ажиллагааг дэмжин ажиллаж байна. Энэ нь бүс нутаг, орон нутгийн тогтвортой хөгжүүлэхэд чухал болохыг олон улсын байгууллага, түншлэгч орнуудын “бүсчилсэн хөгжлийн бодлого”-д илэрхийлсэн байр сууриас харагдаж байна.

Залуучуудын зохистой хөдөлмөр эрхлэлтийг дэмжих зорилгоор кофе бэлтгэж, үйлчлэх соёл, мэдлэг, ур чадвар олгох “Би бариста” сургалтыг 2025 оны 4 сарын 3-аас 6-ны өдрүүдэд Дэлгэр говийн хүн сан болон Юнайтед Ресурсес ХХК хамтран амжилттай зохион байгууллаа.

Үр дүнд чиглэсэн сургалт зохион байгуулах зорилгоор 9 оролцогчийг сонгон шалгаруулан Сайншанд хотноо танхимын сургалтад хамруулсны зэрэгцээ Улаанбаатар хотод ROC Caffeine Bar -ийн кофены үйлдвэр, кофе шопуудтай танилцах аялал, дадлага хийх боломжийг олгосон нь энэхүү сургалтын онцлог юм.

Нийгмийн хариуцлагын хүрээнд Дорноговь аймгийн хүүхэд залуучуудад ур чадвар эзэмшүүлэх, боловсрол олгох болон зохистой хөдөлмөр эрхлэлтийг нь дэмжихэд хамтран ажилласан “Юнайтед Ресурсес” ХХК-ийн удирдлага, сургагч багш болон нийт хамт олонд талархал илэрхийлье.

Дэлгэр говийн хүн сангаас  хүүхдүүдийн бие бялдрын хөгжил, эрүүл мэндийг дэмжих, сахилга бат, хамтын ажиллагаа, манлайллын чадварыг хөгжүүлэх болон охид, хөвгүүдийн адил тэгш спортод хамрагдах боломжийг нэмэгдүүлэх зэрэг зорилгоор "ИРЭЭДҮЙ" хүүхдийн сагсан бөмбөгийн лигийн ерөнхий ивээн тэтгэгч, дэмжигч байгууллагаар ажилласан.

Тус арга хэмжээнд Ерөнхий боловсролын 7-н сургуулийн 24 багийн 270 гаруй тамирчин хүүхдүүд оролцлоо. 

Арга хэмжээний хаалтын үеэр Дорноговь аймгийн Засаг дарга О.Батжаргалаас Дэлгэр говийн хүн сангийн Удирдах зөвлөлийн дарга Ж.Одхүүд хүүхдийн хөгжил хамгааллыг дэмжих, сагсан бөмбөгийн спортыг олон нийтэд сурталчлан таниулж тус арга хэмжээг амжилттай зохион байгуулсанд талархал илэрхийлэв.